7/09/2013

Yeu! Chacho! Qué hazis paí?

Unu delos puntus gordus dela morfología estremeña es la essestencia del vocativu. El vocativu es una categoría morfológica i semántica dela que poquinus restus quean enas lenguas romancis ogañu. Por ponel un clusu, el rumanu gasta de unu en -e palos nombris que vienin dela segunda declinación latina, enque lo mesmu es por causa delas lenguas eslavas: Doamne! Băiete! Algunas escurriajas quean tamién en el griegu d'ogañu: αδερφέ, φίλε.


El vocativu se gasta pa llamal l'atención duna pessona lógicamenti, enque en muchas lenguas tamién se gasta pa cosas. Si miramus el estremeñu, vemus que esta es la sitación del vocativu, pos namás tiramus d'él pa quandu queremus pegal el apitíu a una pessona (enfuncionamientu fáticu). Por essu, tien pocu desenroamientu.

Morfológicamenti, el vocativu estremeñu no vien del latín, sino que se entangó en tiempus más rezientis. La preva está en que namás lo gastamus palos nombris acabaus en -u i en -i con destinta resultancia que en latín. Velaquí cómu se horma el vocativu en estremeñu:

1a crassi
-u → -o
-us  → -os
Pablu → Pablo!
Chiquinus  →  Chiquinos!

2a crassi
-i → -e 
Pepi  → Pepe!

3a crassi
-in  → -en
Carmin  → Carmen!

4a crassi
singulal igual en enunciativu que en vocativu
-is → -es 
Mercedis  → Mercedes! 
Zagalis → Zagales!

En estremeñu, el vocativu namás se gasta quandu se vozea, es dizil, tien namás el gastu de llamal o pa dal un mandau, de má que siempri vá cona seña de almiración (!). V. gr.: Meregildo! Trai el taju pacá!; Álvaro, aguarda aí! 

Si no ai un elevamientu del tonillu, tampocu no se emprea el vocativu morfológicu, en que se mienti ala pessona. Sí múa el artículu, que en estus casus no se gasta. v. gr.: Carmin, eris escapás de arrastral el butacón un poquinu pala camilla? Enas mentacionis en palrandu o en perguntandu, enque vaiga entre parás, no se gasta el vocativu, sino la horma enunciativa, peru sin el artículu:  No te pueis echal una idea, Damasiu, del arrepíu que le dio antiel tardi a tu ermanu; Quieris acercal-mi el casacón, Goru?

Amás, en estremeñu ai algunus vocativus inregularis que se usan por ves de algunus pronombris o nombris. Alas vezis es compricau destendel el arrayu entre vocativu i entrejecionis en estas palabras. Los más corrientis son:

tu → yeu!, heu!, híu!, che!
muchachu → chacho!
muchacha  → chacha!
ermanu → mano!
ermana → mana!

No hay comentarios:

Publicar un comentario